ابوذیّات مدرسة الحیاة
طمعت ابلگمة الدنیا والفهه
ابعماله او ضد هلک صایر ولفهه
صرت مثل الذّی جرحت ولفهه
رمتّه او تمص بشفافه ابهنیّه
...
الما عنده بصر بالگلب ینظر
ابحنانه ابحکمه رب الکون ینظر
الیظر النّاس لابد یوم ینظر
تحرگه النار اذا حارصته میّه
...
الولف نهران لدموعی کراهه
او گعد یخزن اذه ابروحی کراهه
ابچبّدتی او دگ سچاچینه کراهه
او طمع بفلوس چتّالی ابخفیّه
...
الیعادی اهله اباذه او گومه وهم بیه
ابمضیف ایشگگ اهدومه وهم بیه
عمامه اتزوعه من لوعه وهم بیه
یسبب مشکله ابذم الخویّه
...
التگرصه الحیّه لف حبله ولمضاه
او بعد ما یمّن ابوعده ولمضاه
ابناه ما یعرف ابختله ولمضاه
الفقیر اللّه اله صایر تچیّه
...
الک حاسد لبس طبعک ولک جار
ولک عوف الذّی ایفردک ولک جار
ولک خال ابنفس حبّک ولک جار
ولک من نزّعک ثوب الخزیّه
...
ولک لا تلچم اجروحی ولک دار
ولک ضمّدهن ابنوحی ولک دار
ولک گلبی ذهب صافی ولک دار
ولک سکنیته وانت اتعیل بیّه
...
ولک طبعی ذهب طبعک بدل لک
ولک متعصّب اشمالک بدل لک
ولک تحتاج ادرسنّک بدل لک
ولک علّمت رد تعلومی الیّه
...
ولک زعت العرب من فر ولک بر
ولک حفت البحر معبر ولک بر
ولک شو تافخ او تامر ولک بر
ولک شو گمت تتعیّل علیّه
...
ولک ذاک الدرب سرچل ولک سیر
ولک بیدر صفه اهمومک ولک سیر
ولک من حزّم اهطارک ولک سیر
والک بنده التشد شبّاتی الیّه
...
یصب دمعی من اعیونی صفالی
او نزّل نهران بخدودی صفالی
غرگت ابهم فلا واحد صفالی
الاودهم چن غریب اگطعوا بیّه
...
ولک گلبی شبع منّک ولک روح
ولک دوّر ولف مثلک ولک روح
ولک هم حس فلا افیدک ولک روح
ولک مطلوب وانت اتحود بیّه
...
یگلبی لا تون بهدای ون حیل
لفانی الشیب بین اجناب ون حیل
یشبّگنه الیضدنه ابالم ون حیل
اتریّگ ضیم و اتغدّه اباذیّه
...
الیذم اصلک ختل واشراک بالهاک
یحط لک علچ حدر انفاک بالهاک
یغنی لک ابطورک ذاک بالهاک
سبع سوّاک ضد البیه حمیّه
...
انجرح گلبی ابسهم قاتل ولا دای
انظلمت او للظلم ما اطخ ولا دای
ضرب صیتی او هدم بیتی ولا دای
فتک بیهم مثل ما فتک بیّه
...
الدنّیا ایّام معدوده هملهه
او گلبی ایودّع ابدمعه هملهه
یروحی ابدارچ ابگبرچ هملهه
ابعمل صالح یفیدچ زیدی الیّه
...
یگلبی حن علی البیه وفه ونشد
اتبعه ابیا بلد ینوجد ونشد
انگطع حبل الوصل من بعد ونشد
ابسبب یذکر دلالی او عن علیّه
...
یلوم الما دره ابعلتی وعلهه
الذّی کان ابعمق ذلتی وعلهه
علی العاده ارفع ابهمتی وعلهه
اموت اوگوف تالیتی المنیّه
...
ما فر عگلی کل ماکر وذلهه
المصایب گطّعت ظلهه وذلهه
عنید او ما اطخ روحی وذلهه
الموت اهون علی من کل ردیّه
...
ابکلافه ما خطت عینی وصبهه
ابنداره او هدّفت لیهه وصبهه
ابلطافه ابحکمه احزّمهه وصبهه
و ابدل العزاء بفراح او هنیّه
...
انکَرَه کل کاذب ابحلفان والمان
علیمن ینکر او تعبان ولمان
النّاس اجناس راس او ساس والمان
الندّس یثّر علی اخلاق البریّه
...
الشمس ویّه الگمر بالسهر ولفان
او خسر کلمن دخل بالگلب والفان
السعاده بالعلم والادب ولفان
او تبوعتهن الصادق والوفیّه
...
کتبت اشعار بیهه انذار والفیت
ابنظر کلمن یودنی التجی والفیت
انا دایخ ابحب محبوب والفیت
المحب سکران وانا اهذی اباذیّه
...
یگلبی لا تعذب المحب بالریح
او رجای ارسل سلامی ابعجل بالریح
الحب مو بس موده ، ابعطر بالریح
التشمّه اتسکره تسکر های هیّه
...
جماله شمس شع صوبی وذبنی
سلت من خدّه شبّگنی وذبنی
رجعت او سایست گلبه وذبنی
ابّطن عینه او یضل ملفای الیّه
...
اود ابگلبی اشتلنّک شجرتین
شجره من ورد احمر شجرتین
اذا ثمرن شجر کیلو شجرتین
عذابی ایشیل دانگ منّی الیّه
...
اجیت او رحبّت لک هل هلالک
الگلب حن لک واجالک هل هلالک
ابورد یشبه جمالک هل هلالک
او فرشت الدرب بجفونی الوفّیه
...
تهب ویّه الهوی الدلّاک واهواک
او دریتک حیل صاحب شوگ واهواک
بعد لتگول اخذنی اویاک واهواک
عطل جسمی بعد ثوبه المنیّه
...
کل جسمی رگد ما عد ولا اهید
رابض ساکن اموادع ولاهید
بعد ما بیّه اجر ونتی ولا هید
افتهم لن عاطله اجدامی وادیّه
...
الزمان ابصحرا گطفانی ولحمای
او بس گمبوع یبرالی ولحمای
یبس دمی او ذبل عودی ولحمای
امدوبس والیحبنی ایلوم بیّه
...
للاطلاع (گمبوع اسم کلب وفی و شجاع حارص و یفتهم قوی و سریع الحرکه وجدناه جرو فی
غابة الگمبوعه و یقولون ان ابوه ضبع و امه کلبه یعرف الانسان الطیب من الحرامی )
...
ابن ابوی او حاربت دهری علگفای
ابصحرا او حضّی لمتونی علگفای
الوکت طگنی او طبگ ایدی علگفای
الاخو من خان گمبوع اوفه بیّه
...
الدهر چم مرّه یصدمنی واصد بیه
او عین ابعین نتلاگه واصد بیه
لان درعه شبه مرمر وصد بیه
الحمد للّه کسرته ابزود ادیّه
...
الخطر یلفی علیک ابوکت ونمات
السهر لجل الحلال ان جفل ونمات
المع اللّه لا یهاب الموت ونمات
الضبع لو یلفی یعویلک عویّه
...
الگلب حب یرشد احبابه بدء الهم
یخبر اولاده و احفاده بدء الهم
دعاء ایسرهم و اخذ منهم بدء الهم
چساهم خیر و افراح السریّه
...
الدّنیا ابخیر لو عگلک ستر لک
النّاس اشباح و اعیونک ستر لک
الیعدّی العیله و ابحیله ستر لک
یضمّک لو الف تهجم سویّه
...
الامّی او ساکن ابحومه شسلبه
الیجالع سال بلعومه شسلبه
العاجز نازع اهدومه شسلبه
الامّی الجالع العاجز سویّه
...
یگبری ارجوک تانینی ولک هان
العمر خلّص چفن حاضر ولک هان
الموت امتابع الرابض والکهان
ولک وانا قوی او مهلاً علیّه
...
یدهری او ربّی عانانی ولالی
واطفّی ابنار دلالی ولالی
جمعت الام تنعالی ولالی
علی فگری الّی دلّاهن علیّه
...
قبلتاً یا هموم العن وذهباً
عسا تدلن لی ابمالاً وذهباً
غیوماً عاکساً ردّن وذهباً
یداون وانتجن و انهن ندیّه
...
اجت والنّاس مالت من هواها
او یضل یفتر وراهه من هواها
(لا هی حمامه اتدور)
( لا هی شمس و تنور)
( لا هی عطر وایفور)
یهیعونه الگربهه مو هواها
ابسعاده ایعیش ما تلفیه اذیّه
...
شنهی الفاگد الریشات بس طار
او گعد ویّه السباع او اکل بس طار
تطرده اشیوخ یمشی او یرد بس طار
یغث بالنّاس ابو اعیون الجویّه
...
ابچن یا اعیونی ابدم وهلچن
علی الغیّاب اغرّگچن وهلچن
حسافه الوکت دهورچن وهلچن
اتّحدن واشفن اجروح الخفیّه
...
الدهر ما یرحم ابحالی شچالی
ابرماح التایهه انهالی شچالی
طحت واحبابی تربالی شچالی
ابجبل و اببر ذیاب اتحود بیّه
...
قیامه او گلبت العالم من العای
انقهرت او صرختی طالت من العای
ضربنی ابسیف ابن باشه من العای
انکسر سیفه ابوکت صحت ابلعیّه
...
ابحروبه الزمن محرب علی مهلاه
یطالبنی اعلی روحی او عجب مهلاه
دعیت العگل ینطی الخصم مهلاه
انتهت واردود ضل یهجم علیّه
...
جاسم ثعلبی (الحسّانی) 16/01/1400
:: برچسب‌ها:
ابوذیّات مدرسة الحیاة ,
:: بازدید از این مطلب : 1660
|
امتیاز مطلب : 0
|
تعداد امتیازدهندگان : 0
|
مجموع امتیاز : 0
عضو شوید
عضویت سریع
آمار مطالب
آمار بازدید
